7 معلومات لازم تعرفهم عن القاهرة الجديدة

 في سنة 2000، قررت الحكومة إنها تعمل مدينة جديدة بـبنية تحتية وخدمات متطورة؛ عشان تخفف الازدحام، والكثافة السكانية في القاهرة الكبرى.. ومن هنا اتولدت (القاهرة الجديدة) أحد أهم وأجمل المدن المصرية.

1- (الموقع).

موقعها هو واحد من أكبر مميزاتها؛ لإنها موجودة في شرق القاهرة، ومربوطة بكل المدن المصرية بمحاور وطرق رئيسية: زي إن في شمالها طريق القاهرة السويس الصحراوي، وجنوبها طريق العين السخنة، وشرقها طريق الدائري الأوسطي، وغربها الطريق الدائري، ومحور المشير طنطاوي.. كل ده خلى فيه سهولة كبيرة من حيث التنقل منها وإليها + حركة بيع وشراء بشكل مستمر ومتزايد في سوق العقارات..
كمان القاهرة الجديدة قريبة من مطار القاهرة الدولي، وده معناه إن موقعها مناسب لكل من المستثمرين المحليين والدوليين. والمدينة موجودة على ارتفاع 350م فوق مستوى سطح البحر، وبالتالي الجو فيها معتدل ولطيف طول السنة مقارنة بالقاهرة الكبرى.

2- (المساحة).

 بتتمتع بالهدوء والأحياء الواسعة؛ لإن مساحتها بتزيد عن 85 ألف فدان، بالإضافة إن الأحياء ديه مربوطة ببعض بأكتر من طريق ومحور رئيسي ومنهم: الـ90 الشمالي والجنوبي، ومحور محمد نجيب، طلعت حرب، وجمال عبد الناصر. 

3- (أهم المناطق والتجمعات السكنية)، (وهنتكلم عن كل منطقة فيهم بالتفصيل في مقالات جاية).

القاهرة الجديدة بتتقسم إلى عدة أحياء، ولكل حي خصائصه الفريدة زي: 

– اللوتس: قلب القاهرة الجديدة، في شماله الـ90 الشمالي، وجنوبه الـ90 الجنوبي، وبتتميز المنطقة بوجود قاعدة خدمية، سكنية، ترفيهية، وتجارية كبيرة، وبالتالي العائد الاستثماري فيها عالي. 

– الأندلس: موجود بشكل مباشر على شارع الـ90 الجنوبي، وقريب من (الجامعة الأمريكية، منطقة النوادي، العاصمة الإدارية الجديدة، محور محمد بن زايد، الدائري الأوسطي)، وهو حي سكني فاخر، بيتمتع بقلة الكثافة السكانية، وجميع أعمال البنية التحتية فيه متكاملة.

– بيت الوطن: موجود بين الرحاب ومدينتي، وقريب من: العاصمة الإدارية والدائري الأوسطي، طريق السويس، التسعين الشمالي، محور محمد بن زايد، وده بيخليه من أفضل المناطق للاستثمار. 

– التجمع الأول: أول مناطق القاهرة الجديدة اللي تم إنشائها، وفيه مختلف التجمعات السكنية- متوسطة، فاخرة، وفيلات- وبيضم أحياء مميزة زي: ( البنفسج، الياسمين، القرنفل، المستثمرين الشمالي وامتداه).

– التجمع التالت: موجود في جنوب الجامعة الألمانية، وجنب منطقة القطامية، وفيه مجموعة كبيرة من الخدمات الترفيهية؛ عشان قريب من التجمع الخامس. 

– التجمع الخامس: أشهر المناطق في القاهرة الجديدة؛ لإن موقعه حيوي في القاهرة الجديدة، وفيها خدمات  تجارية، ترفيهية، تعليمية كتيرة، وموجودة بين المعادي ومصر الجديدة، وعلى بعد حوالي 20 دقيقة من الداون تاون والقاهرة، وكمان قريب من: محور المشير طنطاوي، طريق السويس وطريق العين السخنة، طريق مرسى مطروح، والطريق الدائري.

– النرجس(والامتداد الجنوبي له): موجود جنب التجمع الخامس، وبالتالي بيستفيد من نفس مميزاته، وبيطل على محور طلعت حرب، جمال عبد الناصر، ومحمد نجيب. 

– شرق الأكاديمية: بيقع بين حي الياسمين وأكاديمية الشرطة، وفيه تنوع من حيث عمارته السكنية (متوسطة، وفوق المتوسطة، وفاخرة). 

– جنوب الأكاديمية: موقعه الجغرافي رائع؛ لإنه بيقع جنب كايرو فستيفال سيتي، وبيحاوطه من الشرق حي الياسمين، ومن الشمال أكاديمية الشرطة، ومن الجنوب شارع الـ90 الشمالي.

– تمر حنة: موجود بالقرب من مدينة الرحاب، ومنطقة النوادي، والـ90 الشمالي. 

4- (الخدمات).

المدينة بتنفرد بمجموعة واسعة ومختلفة من الخدمات، وحسب “هيئة المجتمعات العمرانية الجديدة” فـالقاهرة الجديدة فيها أكتر من 6400 قطعة خدمية بتشمل الآتي: 

-التعليمية: أكتر من 34 مبنى تعليمي (مدارس وجامعات مصرية وعالمية زي: مدرسة آل ياسر الخاصة للغات، مدرسة اخناتون للغات، المدرسة المصرية للغات، المدرسة الأوروبية، المدرسة الفرنسية الدولية،،  الجامعة الأمريكية- الجامعة الألمانية- الجامعة الكندية- جامعة المستقبل- أكاديمية الشرطة).

-الصحية: أكتر من 12 مستشفى، ووحدات صحية، وصيدليات زي: (المستشفى الجوي التخصصي، مستشفى تبارك، مركز البنفسج، مركز الطبيب، مركز المنار الطبي،، عيادات medical park، عيادات Elite،، صيدليات سيف- صيدليات العزبي).

-الرياضية: موجود منطقة النوادي اللي بتضم عدد كبير من أشهر النوادي المصرية زي: (النادي الأهلي، نادي وادي دجلة، نادي الزهور، نادي رويال الرياضي)، بالإضافة إلى مراكز شباب، وملاعب خماسية وثلاثية.

–  الترفيهية والتجارية: أكتر من 12 مبنى ترفيهي تجاري المتمثلة في المولات المنتشرة في المدينة زي: (كايرو فستيفال سيتي مول، بوينت 90، الداون تاون قطامية، أمريكانا بلازا، كونكورد بلازا). 

–  الدينية: أكتر من 20 مسجد زي : ( مسجد الشرطة، مسجد حسن الشربتلي، مسجد قباء). 

5- (المرافق).

– المرافق موجودة بجودة عالية وبطول المدينة؛ عشان تخدم عليها كلها فـمن حيث: 

المياه: طول الشبكات أكتر من 2,000,000 كم (وبالتالي تضمن مياه نضيفة، وموجودة طول الوقت).

الصرف الصحي: تصل الشبكات ما يزيد عن 1,000,000 كم.

الكهرباء: تم تنفيذها بطول يتجاوز الـ 9,000,000 كم.

طرق المواصلات: شبكات طرق تتخطى الـ 5000 كم( وده يوفر سهولة الحركة والتنقل).

الزراعة: مساحة المسطحات الخضراء أكتر من 1000 فدان(وده يضمن إن الهواء في المدينة نقي).

الصناعة: إجمالي قطع الأراضي الصناعية يزيد عن 1000 فدان.

6- (عيوب السكن في القاهرة الجديدة).

– سعر العقارات في إرتفاع مستمر سواء هتشتري أو هتأجر. (ولكن ده مؤشر كويس لـ إن العائد الاستثماري فيها ديمًا هيكون عالي).

– لو معندكش عربية ف هيكون فيه تكلفة كبيرة في التنقلات اليومية.

– في بعض الأماكن تكلفة الخدمات والسلع عالية، وده عشان إيجارات المحلات كمان عالية، فـ ده بيزود سعر إضافي على الخدمات والسلع عشان النشاط التجاري يقدر يغطي التكلفة( ولكن على الصعيد الاستثماري، ممكن تستغل ده لصالحك وتستثمر في وحدة تجارية، فـتضمن عائد كبير على المدى القريب والبعيد) .

– زي ماقولنا إنها على ارتفاع 350م فوق مستوى سطح البحر، فـ ده بيخلي المدينة في الشتا من أكتر المدن الساقعة في مصر.

7- (مميزات السكن في القاهرة الجديدة).

– نتيجة تنوع الخدمات فيها هيخلي الحياة أحسن وأسهل ليك ولأسرتك، فتبقى ضامن: أفضل تعليم، وتقدر تختار ما بين مجموعة متنوعة من المدارس والجامعات، وخدمة صحية على أعلى مستوى، نوادي وأماكن ترفيه وشوبينج كتيرة ومختلفة متوزعة على كل المدينة.

– الطلب على السكن في القاهرة الجديدة في تزايد مستمر، وده بيخلي العائد من استثمارك هنا كبير.

– التخطيط والتصميم المميز للمدينة بيوفر: الهدوء والمساحات الواسعة وقلة الكثافة السكانية.

– مدينة آمنة ومعدلات الجريمة منخفضة جدًا.

– قريبة من مطار القاهرة الدولي، وديه نقطة كويسة للي بيسافروا كتير.

– بنية تحتية حديثة من حيث أنظمة الصرف الصحي، والطرق اللي بيتم صيانتها بشكل دوري، وإمدادات الكهرباء، والمياه الموجودة بشكل دائم، وده معناه إنك هتستمتع بمستوى معيشي مرتفع بأقل قدر من الاضطرابات.

– الهواء النقي بسبب الحدائق والمساحات الخضراء.

– تنوع العمارات السكنية ( متوسطة، وفوق متوسطة، وفاخرة).

(الخاتمة).

القاهرة الجديدة مدينة زي أي مدينة في العالم ليها مميزاتها وعيوبها، ولكن تظل: وجهة مميزة للسكن، ونقطة جذب لعدد كبير من المستثمرين والمطورين، وده راجع لـ (موقعها الاستراتيجي، مساحتها الواسعة، خدامتها المتنوعة، أحيائها الفريدة من نوعها، ومرافقها الموجودة على أعلى مستوى). بشكل عام المدينة فيها فرص ممتازة كتير سواء دلوقتي أو بعدين، فـلو كنت بتدور على أفضل منطقة سكنية أو فرصة استثمارية ذكية بعائد كبير، فالقاهرة الجديدة تستحق إنك تفكر فيها.