أفضل طريقة لحماية فلوسك.. الادخار ولا الاستثمار؟  

– من أهم الاختيارات المصيرية في حياتك “هو اختيار المسار اللي تمشي فيه فلوسك”، والموضوع ده مهم جدا؛ لأنه بيأثر مش بس عليك وعلى مستقبلك، ده كمان على الناس اللي مسؤولة منك، وخصوصًا في الوقت ده؛ عشان الأسعار مستمرة في الارتفاع وقيمة العملة مستمرة في الانخفاض.. فـ لازم تقف وتحسبها صح هل تدخر فلوسك ولا تستثمرها؟

 مبدأيًا إيه هو الادخار؟

هو التحويش أو التوفير.. إنك تخصص وتشيل فلوس على جنب؛ عشان تستخدمها على المدى القريب، وكمان تكون داعم ليك في الحالات الطارئة زي: السفريات، فواتير طبية، تصليح العربية وهكذا. وده بيبقى إدخار قصير الأجل، إنما لو محوش عشان التقاعد مثلاً أو تعليم أطفالك فـ ده إدخار على المدى الطويل.  

– الادخار ممكن تكون مجبر عليه أو باختيارك.. يعني (الادخار الإجباري): ده بيبقى مطبق عليك بموجب قوانين أو لوائح؛ عشان يفيدك فيما بعد، مثلاً الشركة اللي إنت فيها بتشيل جزء من مرتبك على مدار شغلك فيها؛ عشان تسفيد منه في التقاعد كـتأمينات اجتماعية أو صندوق معاشات.

(والادخار الاختياري): هو إنك بكامل إرادتك توفر الفلوس، وتحطها في شهادات أو ودائع بنكية، ودول من أهم وأكتر وسائل الادخار المنتشرة واللي فيه فرق كبير بينهم.
 

الودائع البنكية و شهادات الادخار

– الودائع البنكية: هي ببساطة إنك بتسيب فلوسك أمانة في البنك يحفظهالك لمدة معينة، المدة ديه ممكن تكون (أسبوع، شهر، 3 شهور، 6 شهور، سنة، أو اكتر) على حسب إنت عايز ايه.

وبيتصرفلك منها فايدة يومية أو شهرية أو ربع سنوية أو أكتر، وده برضو على حسب نوع الوديعة اللي انت مختارها في البنك، وممكن تكسرها في أي وقت، بس بتخسر جزء من فلوسك. 

– أما شهادات الادخار:  فهي زيها زي الوديعة من ناحية إنها وعاء إدخاري يحفظلك فلوسك، وتاخد منها فايدة طول مدة الشهادة، وبتبدأ من سنة لحد 10 سنين.

وميزتها إن العائد بتاعها أعلى من الوديعة، بس مينفعش تفُك الشهادة إلا بعد أما يعدي عليها 6 شهور، وكمان بتفقد جزء من فلوسك في حالة لو كسرت الشهادة.

مميزات الادخار 

– وبشكل عام الادخار له أهمية كبيرة ومميزات كتيرة وده اللي أكد عليه (بنجامين فرنكلين أحد مؤسسي الولايات المتحدة) وقال ” القرش الذي توفره بمثابة قرش تكتسبه”.

فـ الادخار صندوق طوارئ يسعفك في أي أزمة، يمولك أي هدف على المدى القريب، ومفيش مخاطرة أو مجازفة بحاجة؛ لإن فلوسك متأمنة في وديعة أو شهادة، بالإضافة إنها أموال سايلة سهل تستخدمها في أي وقت.

عيوب الادخار 

الأموال سايلة سهل تستخدمها في أي وقت، فـ ممكن تتصرف على حاجات مش مهمة، فبشكل كبيرهو مش محكوم.

– أكبرعيب للادخار بشكل عام: إن المبلغ اللي إنت حوشته في أكتر من سنة مثلا، ميبقاش له لازمة في لحظة، وده بيحصل عشان التضخم “السارق الخفي للمدخرات” زي ما وصفته (مارجريت تاتشر: رئيسة وزراء بريطانيا).

– تخيل مثلا إنك محوش 2 مليون جنيه وقررت تشتري عقار.. و لقيت فعلا حاجة عجباك بنفس السعر اللي معاك، وقولت هشتري كمان كام شهر كده، فجأة حصل تضخم: بمعنى إن الأسعار عليت والفلوس اللي معاك قيمتها نزلت، فبقيت محتاج تزود على الفلوس اللي معاك؛ عشان تقدر تشتري العقار. فبشكل عام بتكون خسرت جزء كبير من فلوسك وهم في مكانهم. 

(الاستثمار)

– على الناحية التانية من الإدخار فيه ((الاستثمار)): وهي أي وكل طريقة تزود بيها فلوسك، وتحافظ على قيمتها: زي إنك تشغلها في مجال معين فتحققلك ربح على المدى البعيد، وركز أكتر في حتة المدى البعيد ديه.

لإن لو على المدى القريب تبقى (مضاربة) اللي هو إنت عرفت إن فيه حاجة معينة هتغلى الأيام الجاية فتشتريها قبل ما تغلى، وبعد ما تغلى تبيعها وتكسب من فرق السعر، وده مش بيعتمد على تحليل ودراسة السوق، إنما بيعتمد على الإشاعات. فالمضاربة مش مضمونة ومخاطرها عالية.

– على عكس الاستثمار اللي لازم يستمر لفترة كبيرة، وكمان تبقى واخد القرارعلى أسس وتحليل ودراسة متعمقة، كل ده بيضمنلك إنك تقلل أي مخاطرة أو خسارة تحصل، وميزة الاستثمار إنه بيأمنلك مستقبلك وحياة المسؤولين منك، وبيوفرلك ربح كبير بمجهود قليل، وأهم نقطة إنه بيحميلك فلوسك من أي أزمة أو تضخم؛ لإن فلوسك بتزيد مع أي ارتفاع في الأسعار. 

– وده اللي بيخلي حوالي 75٪ من المستشارين الماليين – بأمريكا في سنة  2020- يوصوا عملائهم بالاستثمار (طبقا لـ market watch).

وعلى أساس ده مجلس الاحتياطي الفيدرالي عمل استطلاع في نفس السنة وكانت النتائج اللي طلعوا بيها: أن متوسط صافي ثروة الأسرة في الولايات المتحدة كان 121.700 دولار، وده عشان أغلبية المواطنين مستثمرين في العقارات.

وده كمان بينطبق على الاستثمار العقاري في مصر؛ لأن سوق العقارات زاد بنسبة 17% من حيث السعر في عام  2020 – حسب التقرير الصادر من JLL الشركة العالمية للخدمات العقارية-  وده حقق دخل كبير، وزود رأس المال للناس اللي استثمروا في العقار. 

– طب ليه أغلب الناس  بتفضل الادخار على الاستثمار؟

عشان إحنا كبشر بنحب نحس ديمًا بالأمان، فنحط الفلوس في جميعات، في شهادات أو ودائع وهكذا.. طرق مفيهاش مخاطرة. وبنخاف من الاستثمار حتى لو هيكسب اكتر؛ عشان فيه مخاطرة عالية، مع إن المخاطرة ديمًا مربوطة بالفايدة والعوائد الكبيرة. 

– طب ليه فيه بعض الناس بتفشل في الاستثمار؟

1- لإنه محتاج صبر واستمرارية.

2-قلة المعرفة والخبرة ( ومتقلقش من نقطة زي ديه؛ لإننا هنعملك سلسلة كاملة عن الاستثمار).

– بشكل عام الادخار والاستثمار غرضهم تجميع فلوس واستخدامها في المستقبل.. فهم وجهان لعملة واحدة، بس ممكن تفضل نفس العملة، وممكن تبقى أكتر من عملة.

(الحل).

إدخر عشان تستثمر، وده اللي قاله -(grant cardone) المستثمر العقاري ورائد الأعمال- ” الاستثمار بيشغل الفلوس، والسبب الوحيد من إدخار الفلوس هو استثمارها”.

 – وده اللي عمله (وارن بافيت) لما كان عنده 11 سنة وفر 114$،  وبدل ما يحطهم في حساب توفير استثمرهم وفضل يستثمر لحد أما بقى دلوقتي واحد من أغنى 10 رجال في العالم بصافي ثروة تقدر بأكتر من 100 مليار دولار. 

– القاعدة الأساسية قبل الاستثمار هي إنك تدخر اللي يكفي إحتياجاتك وإحتياجات بيتك لمدة من 3 :6 شهور.  

 (الخلاصة). 

الادخار مهم في إنه يغطيلك أي التزام على المدى القريب أو أي حاجة طارئة، بس مش هيقدر يحميك من التضخم اللي بيحصل بشكل مستمر، وبالتالي الفكر الاستثماري هو الحل؛ لأنه هيوفرلك عائد عالي، وتقدر تحقق من خلاله كل الأهداف بعيدة المدى زي التقاعد، أو تعليم أطفالك وتأمين مستقبلهم.

 وبشكل عام ديمًا إسأل نفسك: ليه تدخر لما ممكن تستثمر؟ وإيه أنواع الاستثمار؟ ومميزات وعيوب كل نوع! وايه انسب حاجة ليك.. انتظر المقالة الجاية عشان تعرف كل ده وأكتر.