الاستثمار هو عنصر أساسي لتأمين مستقبلك المالي، وتحقيق أهدافك على المدى الطويل، وفي المقال اللي فات إتكلمنا عن الفرق بين الاستثمار والادخار بشكل عام، وإزاي توفق بينهم عشان تحافظ على فلوسك، وفي المقال ده هنركز على أنواع الاستثمار؛ لإنها كتيرة ومتنوعة، وكل اختيار له مميزات وعيوب؛ عشان كده هنساعك تفهم أكتر عن أهم وأشهر طرق الاستثمار.
أ- البورصة.
هي ببساطة سوق بيتقابل فيه البائع والمشتري، بس هنا مش سوق للسلع، إنما هي سوق للأوراق المالية زي: (الأسهم، السندات، صناديق الاستثمار).
1- الأسهم:
نفترض إن فيه شركة عايزة تزود رأس مالها أو تتوسع أكتر، فتقوم تعمل حاجة إسمها (الاكتِـتاب العام): وهو إن الشركة تكون مدرجة في البورصة، وبالتالي ممكن لأي حد إنه يشتري جزء من الشركة ديه، فتقوم مشتري وليكن سهم، وكل أما الشركة تكسب بيبقي ليك نسبة في الأرباح باعتبار إنك مساهم فيها، وكل أما الشركة قيمتها تكبر ف سعر سهمك بيزيد، وتقدر تسفيد منه بفرق السعر وتبيعه.
مميزات الاستثمار في الأسهم:
- مواجهة التضخم؛ لإنك هنا حاطط فلوسك في ورقة مالية قيمتها بتزيد مع الوقت.
- سهل تشتريه وتبيعه، وبالتالي بيوفرلك سيولة مالية.
- كل أما الاقتصاد بيعلى، فلوسك بتزيد.
سلبيات الاستثمار في الأسهم:
- سوق الأسهم ديما في حالة تقلب ومخاطر، فممكن قيمة سهمك تقل بشكل كبير وسريع وغير متوقع، وتخسر كل فلوسك، فبالتالي مفيش ضمان للعائد على استثمارك(انت شريك في المكسب والخسارة).
- لازم خبرة ومعرفة كبيرة بسوق الأسهم، والبيانات المالية واتجاهات السوق، وأداء الشركات، والظروف الاقتصادية، والأحداث السياسية.
- رسوم وعمولات على العائد الخاص بيك.
2- السندات.
لو فيه حكومة أو شركة عايزة تمول مشروع خاص بيها ومحتاجة فلوس، بس مش عايزة شراكة مع حد زي الأسهم، هنا تصدر (سندات) وهو إنك بتسلف الشركة ديه مبلغ لمدة معينة بتتفق معاهم عليها،
وبيطلعلك فايده دورية في شكل كوبونات، وفي أخر المدة بتاخد المبلغ اللي دفعته في الأول بالكامل.
مزايا السندات:
– بتوفر دخل ثابت من خلال الفايدة الدورية.
– مخاطرها أقل من الأسهم.
عيوب السندات:
-العائد منها قليل لإن مفيش فيها مخاطرة (وقاعدة عامة: كل أما تزيد الخطورة، يزيد العائد).
– بما إن فلوسك بتتحفظ لوقت معين، ف ممكن تفقد قيمتها لو حصل تضخم.
3- الصناديق الاستثمارية (توجد في البورصة والبنوك).
لو إنت عايز تستثمر في السندات أو الأسهم ومعندكش خبرة ووقت، وعايز كمان تضمن فلوس في شهادات أو ودائع بنكية يبقى الحل هنا في الصناديق الاستثمارية. وهي عبارة عن صندوق فيه فلوس لعدد كبير من المستثمرين، وبيديره خبراء ومتخصصين بالنيابة عنك، وبيحطوا استراتيجية يمشوا بيها الصندوق عشان يحققوا ربح، والصندوق بيستثمر في أكتر من أداة مالية، بمعنى إنه بيبقى فيه أسهم، سندات، شهادات بنكية، ودائع أو كلهم مع بعض، وده على أساس نوع واتجاه الصندوق، وبيكون فيه عائد دوري أو تراكمي.
مزايا صناديق الاستثمار:
– تقدر تسحب فلوسك في أي وقت من غير خصم على عكس الشهادات.
– بيديروا ناس محترفة وعندهم خبرة، وبالتالي إنت مش محتاج تضيع وقت أو مجهود في متابعة استثمارك.
– التنوع والاستثمار في أكتر من حاجة في نفس الوقت.
عيوب صناديق الاستثمار:
- بتدفع رسوم ومصاريف إدارية، وبتتحصل منك مقدما سواء الصندوق حقق مكسب أو محققش، وده بيقلل نسبة العائد.
- الأرباح مش ثابتة ومش مضمونة.
ب- العقار.
هي سلعة من أكتر السلع أمانًا في أي وقت وكل مكان، عشان الحاجة للمسكن بتيجي ديمًا في أولويات احتياجات الإنسان، وده يخليك لما تيجي تستثمر في العقار تضمن إنك هتحقق عائد كبير؛ لإنه استثمار دائم طالما فيه بشر. وسوق العقارات هو من أكتر الأسواق اللي بتتميز بنموها وخصوصا مصر، ووفقًا لتقرير صادر عن شركة الاستشارات العقارية العالمية (نايت فرانك) قالت إن ” أسعار العقارات في مصر ارتفعت بنسبة 7.5٪ في عام 2020 ، وده يخليها واحدة من أسرع أسواق العقارات نمواً في العالم.
الايجابيات:
- دخل ثابت ومستمر في حالة لو إشتريت عقار وأجرته.
- قيمتها بتكبر مع الوقت، وده يخليك لما تيجي تبيع تكسب أكتر.
- من أكتر الاستثمارات اللي بتحفظلك فلوسك وبتواجه التضخم بشكل كبير.
- السيطرة الكاملة على استثمارك على عكس الأسهم والصناديق.
- مفيش مخاطرة.
- أصل ملموس وسهل تتعامل معاه بدون خبرة كبيرة.
- استثمار دائم ومستمر ليك ولكل عيلتك.
- تنوع كبير في سوق العقارات فـممكن تستثمر في: (وحدات سكنية، تجارية، طبية، صناعية)
السلبيات:
- على عكس الأسهم، مينفعش تبيع جزء منه لو كنت محتاج بعض الفلوس.
- لما بيرتفع سعر الدولار، بتزيد طبعا أسعار مواد البناء، وده بيخلي المطورين يأجلوا تسليم المشاريع أو يرفعوا أسعار الوحدات.
- مجهود في إدارة العقار وتحصيل الإيجار وصيانته.
- لو اختارت عقار في مكان مش مميز أو فيه مشاكل كتير، هيكون فيه صعوبة ومجهود ووقت عشان تبيعه بعد كده.
ج- الذهب.
هو من المعادن الغالية، ومعروف بأهميته من زمان، وهو مخزن للقيمة وعشان كده بيتم استخدامه في الاستثمار.
مميزاته:
– أصل مادي ممكن تحتفظ بيه على عكس الأسهم والسندات.
– ملاذ آمن؛ لإنه بيميل للاحتفاظ بقيمته.
– واحد من أكتر الأصول المالية من حيث الطلب والانتشار على مستوى العالم، فمقدار الطلب العالمي على الذهب في سنة 2021 كان أزيد من 815 طن.
– سهل تعرف اتجاهات السوق الخاص بيه ومستقبل أسعاره؛ لأنه مرتبط بسعر الدولار.
عيوبه:
- مبينتجش عنه أي سيولة نقدية مستمرة زي الفوائد والأرباح من الشهادات والأسهم، انت بتشتريه وتستنى سعره يعلى عشان تبيعه وتكسب من فرق السعر.
- بيتأثر بشكل كبير بالأوضاع السياسية وده بيسبب تقلب كبير في أسعاره.
- لو اشتريت ذهب وحطيته في خزنة بالبنك مثلا هتتكلف مصاريف تخزين وتأمين.
- ممكن تواجه صعوبة في بيعه.
أنواع الاستثمار كتيرة، وكل نوع له مميزات وعيوب، وطبيعي إنك تحتار إيه أحسن قرار، وإيه فيهم اللي يخليك تستثمر فلوسك صح وتكسب أكتر، ولكن هيفضل الاستثمار العقاري هو أكتر استثمار آمن ومربح، وفلوسك بتزيد فيه سنة بعد سنة؛ لإن أسعار العقارات ديمًا في ارتفاع مستمر؛ بسبب الطلب العالي عليها، و ده حسب تقرير أصدرته شركة ” نايت فرانك” العقارية، وقالت إن أسعار العقارات في مصر ارتفعت من سنة 2020م، فـمثلاً أسعار الشقق ارتفعت بنسبة 14%، والفيلات بنسبة 8%، والأراضي بنسبة 20 %..
عشان كده ديمًا خبراء الاقتصاد بينصحوا بالاستثمار العقاري؛ لإنه بيحمي الفلوس، وبيوفر عوائد عالية على المدى القريب والبعيد. وفي المقالة الجاية هنقدم معلومات أكتر عن الاستثمار في العقارات، وكمان نصايح للمستثمرين اللي عايزين يبدأوا وينجحوا في المجال ده.. انتظرونا.
